阿史今日見到中國歷史研究院嘅微博，原來以西曆計今日係滿清政府同英國簽署不平等條約《南京條約》嘅「紀念日」，呢一日對於中國人而言帶嚟嘅回憶，就係中國响開始成為半殖民地區嘅開始，可以話係國恥嘅起點。
「南京條約」又叫做《江寧條約》、係清政府第一條因為戰敗畀歐美國家所簽嘅不平等條約。喺1839年3月，由於林則徐到廣州嚴禁鴉片，同英國產生貿易、司法、外交等方面嘅衝突，令到英國政府內閣喺同年10月決定派遣遠征軍到中國。戰爭以1842年7月鎮江1500位八旗兵與英軍展開激烈巷戰而戰敗作結，經過交戰雙方喺靜海寺多次嘅談判，最後响英軍旗艦康華麗號上正式簽訂《南京條約》。
《南京條約》入面內容除咗滿清要賠償二千一百萬銀圓畀英國外，更要開放五個沿海城市作為通商港口、廢除公行制度、建立進出口關稅制度，又要清政府承認英國強佔香港島並交俾英國管理。呢條不平等條約成為咗列強欺壓中國嘅最壞先例，後嚟唔同國家就通過唔同方式（主要係戰爭）响中國同中國人身上取得利益，中華民族被拖入困鎖响屈辱嘅深淵。
原圖嚟自網絡